Encontro Youtubeir@s no Carballo Interplay

O Encontro Youtubeir@s no Carballo Interplay foi unha experiencia enriquecedora e moi ben valorada pol@s tres youtubeir@s participantes, ao tratarse dun Festival do audiovisual xa consolidado e no que participan xa referentes a nivel internacional.

Eira Losada, María Yáñez, Nuria Espasandín, Mónica Fernández e Xacobo de Toro no Carballo Interplay

Tamén foi moi positiva a posibilidade de compartir experiencias entre @s propi@s youtubeir@s: desde que programas utilizar á hora de gravar ata a inspiración das temáticas ou as diferentes motivacións á hora de poñerse diante dunha cámara a contarlle ao mundo as súas inquedanzas.

A moderadora foi María Yáñez. Tamén participou a coordinadora desta edición representando aos SNL, Mónica Fernández,  e tres youtubeir@s cun nexo común: ter sido finalistas na edición anterior. Porén, cada un/ha con diferentes motivacións. Xacobo de Toro mantén unha canle educativa, para que logo digan que o ensino e o YouTube non son compatibles! A Nuria Espasandín gústalle aproveitar as novas tecnoloxías para expresar os seus sentimentos e comunicarse, ten na actualidade tres canles abertas. A terceira youtubeira é a estudante de bacharelato Eira Losada ou, máis ben, Nubesbaixoti, que é como se nos presenta, explica que fai aqueles vídeos que lle gustaría consumir.

Chegar ao YouTube para ficar

@s tres recoñecen que ter participado nos Premios Youtubeir@s provocou que tiveran máis subscricións nas súas canles e que foran máis visitadas. Tod@s el@s chegaron a youtubeir@s coa intención de ficar, por iso non deixaron de publicar vídeos e volven estar presentes na edición deste ano.

Eira foi seleccionada finalista cun vídeo-opinarmos sobre o galego. Segundo ela, tiña ganas de facer esta reflexión porque é algo que lle acontece a diario, o asombro de que unha rapaza nova fale galego todo o día nun contexto urbano. Pola súa banda, Nuria foi finalista co seu traballo “Esquezamos o soporte”, no que quería facer unha reflexión sobre a valoración que se fai do corpo doutras persoas sen reparar nas consecuencias. Xacobo de Toro contou como co vídeo “Falar malpicán” puxo a traballar ao seu alumnado, desde a investigación nas propias familias, localización de espazos… ata o proceso de gravación e edición. Destaca como este vídeo contribuíu a subir a autoestima destes mozos e mozas e a poñer en valor a súa lingua e comarca. 

O galego como lingua vehicular

Mónica valora que nesta edición aumentou a calidade técnica nos vídeos. En canto á temática, sinala que é destacable que xa non aparezan xustificacións de por que unha canle en galego, ou falar sobre o galego. Considera que iso xa é camiño andado dentro do proxecto, o galego é a lingua vehicular, a temática pode ser calquera.

María Yáñez, gran coñecedora do mundo audiovisual, tamén achegou unha reflexión interesante, augurando un estilo con marca galega n@s nos@s youtubeir@s: a transmisión de saberes d@s nos@s maiores. Que haxa xente nova gravando a persoas maiores é moi importante non só polo que nos transmiten senón tamén por como nolo transmiten.

Comenta nas nosas redes sociais

Uso de cookies

Como todos os sitios de internet este sitio web utiliza cookies para que vostede teña a mellor experiencia navegando. Se continúa navegando está a dar o seu consentimiento para a aceptación das mencionadas cookies e a aceptación da nosa política de cookies, faga clic na ligazón para máis información.plugin cookies

ACEPTAR
Aviso de cookies