Queres comezar a crear contidos na Rede e non sabes como? Cal é o formato axeitado? Necesitas investir moito en material? Sobre que tema podes falar?
O sábado 1 de febreiro de 2025 no Pazo da Cultura de Narón, de 17 h a 17.50 h, Nuria Espasandín e Sergio Casal de Toxío impartirán un obradoiro para crear contidos na Rede a través de consellos prácticos onde responderán todas estas preguntas. Ademais, darán a coñecer os contidos en galego na Internet e ofreceranche ferramentas e recursos na nosa lingua para resolver todas as túas dúbidas lingüísticas.
Nuria Espasandín é xurista e activista polos Dereitos Humanos e dos animais non humanos. Esta vida levoume por tantos camiños que me fixeron esquecer a liña que separa o profesional do persoal. Non entendo ningún proxecto que non requira entregar todo o que son. E iso é o que veño aportar a TOXÍO. Un cacho de min que soa a moito: a vida.
Sergio Casal defínese como xornalista especializado en comunicación política. Apaixonado pola fotografía e a realidade política do mundo. Esta mestura vocacional e unha gran paixón por comunicar enchen a miña mochila de cara a este proxecto con Nuria. TOXÍO é a fiestra ao mundo desde os nosos ollos.
A canle de YouTube TOXÍO foi galardoada nos Premios Youtubeiras+ en 2021 co Premio Calidade Técnica e acadou tamén o Premio Canle no ano 2022.
Esta actividade está aberta ao público, baixo inscrición previa, para un máximo de 50 persoas. Inscríbete e atrévete a crear contido en galego na Rede!
Ademais…
Ás 19 h comezará a gala de entrega de premios Youtubeiras+ no auditorio do Pazo da Cultura de Narón. Contará con interpretación en lingua de signos. Estará conducida por Javi Sánchez (Meiga-i) e coa actuación musical de De Ninghures. Para asistir podes retirar entrada gratuíta no propio Pazo da Cultura, vía telefónica no 981 102 897, de luns a sábado, de 09.30-14.00 e de 17.30-20.30, ou a través de taquilla.pazo@naron.gal.
Por se fose pouco, entre o obradoiro e a gala, haberá un aperitivo na entrada do propio Pazo da Cultura, onde relaxarse antes da entrega de premios, posar diante da cámara, rexoubar sobre quen cres que serán as canles vencedoras e responder ás preguntas de Gabri Fuentes en directo para as nosas redes.
Agardámoste!
